為菲律賓事件祈禱

響八月廿四號朝早，當我一開著電腦，進入 Facebook，睇到既唔係平時網友發放出黎既開心訊息，唔係網友 Upload 上去既旅遊相，亦都唔係專頁既更新消息。取宜代之既，就係一段段八月廿三號，香港旅行團響菲律賓被脅持既慘痛影片同網友支持既說話…


雖然我尋晚因為太攰既關係，四點鐘已經訓著左，連晚飯都冇食，所以錯過左現場直播，冇親眼睇到港人遇害既場面。但係，今日我一直四處尋覓希望可以重新睇過一次整件事，了解一下點解會發生呢件事，導火線又係邊到呢。好彩俾我響 myTV 同 Youtube 俾我搵到全個過程，我花左一日既時間去觀看所有既影片，第一個俾到我既感覺係 —— 個劫匪好冷血，居然可以用一個咁小事既理由，就綁架全車旅行團既香港人，全車人頓時變成人質。黎到呢到，我個心已經好憤怒，再睇落去，到左夜晚，個綁匪突然間獸性大發，先開第一槍，將領隊殺死，然後亂槍掃射人質，最後特警圍攻，花左一個鐘既時間，由守候已久既狙擊手殺死。之後既片段就係旅行社公佈，呢次事件導致八名香港人遇難，七名港人受傷，仲有生環者之一梁太既訪問片段。


事情發展到咁，我感覺到非常傷心，也不禁落下男兒淚，我響呢一生入面，從未見過咁既事件發生響香港人身上，心情極沉重。就係響呢一刻同時，我決定要深入去了解事件，睇下究竟係邊個既錯。我參考過各方面既資料，得出以下既觀點：第一，菲律賓既狙擊手係冇趁劫匪開車門既時候，乘機殺死他；第二，談判專家策略出錯，樣樣都 Say NO! 又冇俾機會個劫匪企定定俾機會狙擊手攻擊；第三，政府不肯接受劫匪提出既要求，包括復職同一百萬披索 (約十七萬港元) 贖金，只提出會在十日內處理，令到劫匪態度開始轉變；第四，當疑犯既細佬同老婆去勸佢個陣，第一次係失敗，但第二次佢細佬希望可以登上旅遊巴勸說，卻俾當地警方以為佢係同謀，沒收佢既武器同埋拘捕佢，當劫匪睇到呢件事，憤怒到極點，舉起槍，將領隊殺死 (另一個講法話領隊俾菲警誤殺) 然後再用手槍<<<並非 M16 殺死另外五個團友 (有傳只係殺左兩個) ；第五，賓警響旅遊巴向前移動時，開第一槍射爆車汰，此舉亦可能激怒左劫匪，司機趁劫匪走到車尾，乘機逃走，向外面既人宣佈全部人質被殺，所以特警 (有人話佢地只係掃毒隊) 立即行動，以對角形式包圍旅巴，用鐵槌打爆玻璃 (傳聞有人質被打死或打傷) 及用麻繩嘗試打開車門。槍手繼續殺人，走過梁太和梁太個仔用 M16 對佢地開槍，梁太個槍俾老公擋住，老公死；而個仔個槍就由佢妹妹擋住，阿妹死。響呢段入面感受到親情既愛係幾咁偉大，其他旅客就被打傷。最後特警放左個催淚彈入去，劫匪被逼走到車頭，被狙擊手一槍殺死，了結整件事。


呢件事對我有好大影響，影響左我心理、想法同埋行為，亦對我有好大既啟發。我以前睇到呢 D 事件既時候，我第一時間唔會係同情佢地，反而係去用呢 D 事做笑柄，冇理過別人既感受，亦唔會將事件放上心上，當冇事發生過 (或許過往既事都唔關香港人事) 。今次，我受既打擊唔少，我一向都怕死，但係見住咁多人被槍殺，心裡好悲傷，仲要係自己香港人…咁樣係未能令到我無法忘記呢件事，但係知道左佢地係被人脅持同槍殺，加上菲警及特警既無能、遲鈍，令我感到不滿和憤怒。劫匪當然係大錯特錯，但係點解救人行動要咁耐先開始，而攻入旅遊巴又花時咁耐，狙擊手又點解唔把握劫匪開車門出黎既機會呢。睇番外國同類事件既片段，我覺得佢地係冇接受過訓練，點解要花上一個鐘先可以打死槍手，花上半個鐘都唔能夠將車門打開，花左好耐時間先開到太平門，點解一入去唔夠五秒就走番出黎，點解有 D 警員連避彈衣或者槍都冇。呢 D 都希望菲方可以俾一個合理既解釋俾我地，我唔希望白白見到佢地犧牲。從前，我冇諗過響危急既情況之下，向家人伸出援手，更何論係為自己家人犧牲。但係，經過今次事件之後，我會徹底改變呢個睇法，因為睇到梁生同佢細女既行為，我覺得好感人，係我地香港成年人及青少年人既榜樣，我地要好好去學習。最後，我要多謝呢次事件讓我學到好多野，要為親人、朋友而犧牲自己，配合今年 Camp 學到既野應用出黎，我會做到最好。


願主祝福各位，生還者努力活下去，死難者主懷安息，享受天國既生活，亦希望梁太個仔早日醒番同康復。


以下係我個朋友提出既祈禱方向
我在此呼籲大家在這個月餘下日子裡，每晚抽10分鐘為呢件事祈禱：
1) 為死難者家屬求平復心情，特別係梁太及其長子(她的丈夫和兩名女兒死去)，還有十多歲的兩姊弟(他們的父母和姨媽死去)，以及領隊的家屬。
2) 為呢個國家求公義 (不要單單怪責槍手的冷血和特警的無能，也要思考為何一個模範警察走上這條路，是否有太多不公義之事在發生，但受屈受壓迫的人卻無處申訴？)
再一次懇請各位，抽10分鐘祈禱，眾人祈禱所發出的力量是大的！


P.S. 解釋多少少第2點，要為呢個國家的公義祈禱：幾年前菲國曾有一個幼稚園校長要挾持幼稚園學生，為左喚醒人們對幼兒教育經費不足的關注。點解一個國家的人民要用到呢種手法去表達意見？就係因為成個國家suck左，公義不彰.... 呢件事正正提醒我們，要為公義祈禱！